«Марскія дроны УСУ перапісваюць правілы марской вайны»

• 31.05.2025, 14:36

Украіна не проста абараняецца, але і ўстанаўлівае новыя стандарты.

Выкарыстанне такіх дронаў, як Magura, перапісвае правілы вядзення марской вайны. Аб гэтым заявіў брытанскі мецэнат і прадпрымальнік лорд Майкл Эшкрофт на адкрыцці Black Sea Security Forum 2025, піша liga.net.

З яго слоў, Украіна, не маючы традыцыйнага вайскова-марскога флоту, змагла нейтралізаваць і адхіліць буйную марскую дзяржаву дзякуючы інавацыям. Гэта фармуе новыя стандарты праявы марской сілы ў XXI стагоддзі.

«Выкарыстанне Украінай беспілотных марскіх дронаў, такіх як Magura, перапісвае правілы вядзення марской вайны. Я меў гонар асабіста азнаёміцца з гэтымі тэхналогіямі і пагутарыць з кіруючымі імі аператарамі. Іх вынаходлівасць уражвае», - адзначыў ён.

Эшкрофт таксама згадаў, што нядаўна марскія дроны спецпадраздзялення «Group 13» Галоўнай управы выведкі Міністэрства абароны Украіны знішчылі два расейскія знішчальнікі Су-30. З яго слоў, гэта падзея - паваротны момант у гісторыі вайсковай справы.

«Украіна не толькі абараняецца, яна ўстанаўлівае новыя стандарты таго, як марская сіла можа праяўляцца ў XXI стагоддзі. Вялікая Брытанія, з яе слаўнай марской традыцыяй, павінна шмат чаму павучыцца ва Украіны. Тое ж тычыцца нашых еўрапейскіх хаўруснікаў», - дадаў ён.

Лорд Эшкрафт падкрэсліў, што вучыцца ва Украіны - гэта не толькі акт салідарнасці, але і важны крок у падрыхтоўцы да будучых канфліктаў у новым геапалітычным кантэксце.