Лукашэнка схлусіў пра бульбу
- 31.05.2025, 14:30
Жаданне зарабіць адключае ва ўладаў здаровы сэнс.
26 траўня ў адказ на ўведзеныя раней Еўрапейскім Звязам санкцыі на экспарт з Беларусі прадуктаў харчавання і азотных угнаенняў беларускі ўрад пастанавіў зрабіць жэст добрай волі. Ён скасаваў уласнае эмбарга на ўвоз у Беларусь некаторых тавараў з недружалюбных краін. Як гаворыцца ў афіцыйным каментарыі да гэтай пастановы: «Беларусь чарговы раз дэманструе адкрытасць, міралюбнасць, прынцып добрасуседства», піша сайт «Белорусы и рынок».
Паводле дзіўнага і абсалютна выпадковага збегу абставін эмбарга скасаванае на імпарт у Беларусь бульбы, капусты, яблыкаў і цыбулі. Гэта значыць, ну проста так ненаўмысна супала, што вось гэты жэст добрай волі ўрад зрабіў акурат для тых прадуктаў, з якімі ў Беларусі зараз назіраюцца часовыя цяжкасці.
З яблыкамі часовыя цяжкасці пакуль не назіраюцца, але гэта толькі калі глядзець на яблыкі няўзброеным вокам. Таму што насамрэч сітуацыя з беларускімі яблыкамі насамрэч яшчэ горшая, чым з беларускай бульбай. І лепшай не стане.
«З яблыкамі гэты год будзе напэўна не вельмі ён ураджайным», - сказаў Лукашэнка на сустрэчы са старшынём Берасцейскага аблвыканкама.
Але часовыя цяжкасці з яблыкамі незаўважныя няўзброеным поглядам, бо для яблык беларускі ўрад зрабіў ужо жэст добрай волі, дазволіўшы ўвозіць у краіну яблыкі з Польшчы. У красавіку Польшча паставіла ў Беларусь у шэсць разоў больш яблыкаў, чым у сакавіку.
Проста калі ўлады рабілі жэст добрай волі для польскіх яблыкаў, яны яго так шырока не рэкламавалі. Ну а зараз пастанавілі, што калі ўжо ганьбіцца, то ганьбіцца трэба да канца. Таму што калі вы спрабуеце выдаць вось гэтую абсалютна змушаную пастанову аб допуску на рынак еўрапейскай гародніны і садавіны за жэст нейкай добрай волі, то гэта выглядае, вядома, смешна і недарэчна. Як недарэчная ўвогуле ўся сітуацыя з вялікім дэфіцытам бульбы ў Беларусі.
Настолькі недарэчная, што тэма вялікага бульбянога дэфіцыту ў Беларусі выйшла на высокі міждзяржаўны ўзровень. На нарадзе 27 траўня на тэму беларускага бульбянога дэфіцыту пажартаваў Пуцін. А беларускім чыноўнікам слухаць такія жарты ж непрыемна.
Вы там ствараеце ўласнае NASA і ўсім распавядаеце пра свае касмічныя караблі, атамную і іншую геапалітычную веліч, а потым у вас бульбачка канчаецца. На той жа сустрэчы са старшынём Берасцейскага аблвыканкама Аляксандр Лукашэнка сказаў, што пытанне з бульбай занадта сур'ёзнае, каб з гэтага можна было жартаваць. І што трэба давесці, што ніякіх праблем у Беларусі з бульбай не бывае.
«Што, што, а бульбу мы вырошчваць умеем. Трэба вырасціць столькі, каб выстарчыла нам і Расеі. Кошты будуць прыстойныя, за год ні мы, ні яны сітуацыю не зможам паправіць», - сказаў Лукашэнка.
Гэта значыць, пакутаваць з бульбай нам давядзецца не месяц, як Лукашэнка абяцаў раней, а крыху больш. Бо ні мы, ні Расея гэтую сітуацыю з бульбай за год паправіць не зможам. Але пры гэтым Беларусь усё адно збіраецца сваю бульбу, якую сёлета пасадзілі, прадаваць у Расею. Хоць менавіта продажы бульбы ў Расею ў вялікай колькасці летась былі адным з чыннікаў нашага цяперашняга дэфіцыту.
Але на продажы бульбы ў Расею можна зарабіць крыху грошай. А калі з'яўляецца перспектыва зарабіць крышку грошай, у беларускіх уладаў адключаюцца не толькі ўсе засцерагальнікі, але і разумны сэнс.