У магілёўскіх крамах знайшлі буйныя партыі пратэрмінаваных і сапсаваных прадуктаў

• 30.05.2025, 10:48

Іх прыбралі з гандлю.

Камітэт дзяржкантролю Магілёўскай вобласці выявіў шматлікія парушэнні ў гандлі мяснымі, каўбаснымі вырабамі і прадукцыяй садавіны і гародніны. Аб гэтым паведамілі ў прэс-службе КДК.

Дарэчы, пасля праверкі адной з крамаў буйной рэгіянальнай гандлёвай сеткі канфіскавалі з продажу больш як 10 кг мясных паўфабрыкатаў са скончаным тэрмінам прыдатнасці і больш як 50 кг мясных і каўбасных вырабаў з парушэннямі ўмоў захоўвання, а таксама без маркіроўкі, якая змяшчае звесткі аб даце і часе ўскрыцця пакавання.

Акрамя таго, супрацоўнікі дзяржкантролю выявілі садавіну і гародніну з прыкметамі псуты. Гандлёвы аб'ект прыцягнулі да адміністрацыйнай адказнасці.

Таксама Дзяржкантроль выявіў, што ў двух магілёўскіх гандлёвых пунктах завышалі гандлёвыя надбаўкі на некаторую садавіну і гародніну на 10–52%. А, напрыклад, цыбуля і морква прадаваліся коштам у 2,5 разы вышэйшым за максімальна дазволены.

Як паведамілі ў прэс-службе Камітэта дзяржкантролю, парушэнні аператыўна ліквідаваныя.