Нетаньяху прыняў новую прапанову Уіткафа датычна Газы

• 29.05.2025, 20:30

Прапанова прадугледжвае, сярод іншага, 60-дзённае спыненне агню.

Ізраіль пагадзіўся з новым варыянтам угоды, прапанаваным спецпасланнікам ЗША Стыва Уіткафа для вызвалення закладнікаў і спынення агню, заявіў прэм'ер-міністр краіны Біньямін Нетаньяху, піша Israel National News.

У той самы час прэм'ер-міністр усумніўся ў намерах палестынскага руху ХАМАС, які «да гэтага часу не адказаў».

«Мы не верым, што ХАМАС верне апошняга закладніка, і таму мы прадаўжаем барацьбу да таго часу, пакуль ХАМАС не будзе ліквідаваны і мы не сыдзем з сектара Газа, пакуль усе закладнікі не будуць у нашых руках», – сказаў Нетаньяху падчас сустрэчы з чальцамі сем'яў загінулых закладнікаў.

Да гэтага ХАМАС апублікаваў заяву, у якой гаварылася, што ён вывучае прапанову Уіткафа і прыме пастанову «такім чынам, які будзе служыць інтарэсам народа».

Паводле звестак The Jerusalem Post, апошняя прапанова ЗША прадугледжвае 60-дзённае спыненне агню, у адпаведнасці з якім будуць вернутыя 10 жывых закладнікаў і 18 целаў. Акрамя таго, план прадугледжвае вывядзенне з нядаўна захопленых раёнаў сектару Газа Войска абароны Ізраіля, а таксама вяртанне размеркавання гуманітарнай дапамогі да Арганізацыі Аб'яднаных Нацый.

Хамас, паводле інфармацыі выдання, не прымае прапанову Уіткафа «за чыстую манету» і запатрабаваў зменаў, паколькі яна з'яўляецца больш прадузятай на карысць Ізраіля.

Да гэтага Ізраіль і ХАМАС двойчы складалі перамір'е і абменьвалі ізраільскіх закладнікаў на палестынскіх зняволеных. Апошняе спыненне агню скончылася ў сакавіку. Дамовіцца пра ягонае падаўжэнне бакам не ўдалося.

У траўні Ізраіль абвясціў пра пачатак новай наземнай аперацыі ў сектары Газа – «Калясніца Гідэона». Цяпер там разгорнутыя ўсе рэгулярныя пяхотныя і бронятанкавыя брыгады ЦАХАЛ. Акрамя брыгадаў «Галані», «Гіваці», «Камандас», «Кфір» і іншых у палестынскім эксклаве знаходзяцца таксама рэзервовыя падраздзяленні.