У Магілёўскай вобласці медыкі запісалі 250 беларусаў як замежнікаў

• 29.05.2025, 11:14

Каб выканаць паказчыкі.

У некалькіх лякарнях Магілёўшчыны грамадзян Беларусі для надання платных паслуг часам праводзілі па дакументах як замежнікаў. Знойдзена 250 такіх выпадкаў, паведаміла пракуратура Магілёўскай вобласці.

«У выніку такога падыходу стала магчымым выкананне даведзеных да ўстаноў аховы здароўя паказчыкаў. Разам з тым такія дзеянні службовых асоб пацягнулі за сабой парушэнні пры падачы дзяржаўнай статыстычнай справаздачнасці аб экспарце медыцынскіх паслуг», - паведамілі ў пракуратуры.

Паводле гэтых фактаў міліцыя ўжо арганізавала праверкі.

Акрамя таго, высветлілася, што ў статсправаздачнасць уключаліся скажоныя звесткі «аб аднясенні асобных замежных пацыентаў да дзяржаў, грамадзянамі якіх яны не з'яўляліся, і іх прававая сувязь з краінай адсутнічала».

Выявілі парушэнні і пры праверцы замежнаэканамічных дамоў - не ўносіліся даты складання, анкетныя і пашпартныя звесткі, адрасы заказчыкаў платных медпаслуг.

Пракуратура прыйшла да высновы, што ў правераных медустановах не зжыты фармалізм і прыпіскі для стварэння бачнасці выканання планавых паказчыкаў.

Намеснік пракурора Магілёўскай вобласці ўнёс на адрас намесніка старшыні Магілёўскага аблвыканкама прадстаўленне, у якім запатрабаваў устараніць выяўленыя парушэнні. Да дысцыплінарнай адказнасці прыцягнутыя больш за 30 чалавек.