Па менскім вакзале ходзіць мужчына са стосам грошай у руках

• 28.05.2025, 13:14

Але просіць грошы на квіток.

Схема «дайце грошай на праезд» працягвае абрастаць рознымі персанажамі. Чытач Onliner.by Дзмітрый западозрыў, што сутыкнуўся якраз з такім серыйным збіральнікам грошай на квіткі - той просіць 10-20 рублёў, але нікуды не з'язджае.

Дзмітрый кажа, што заўважае мужчыну каля чыгуначнага вакзала ў Менску ўжо трэці раз. Той трымае ў руках стос грошай і паралельна просіць дапамагчы з квітком у Расею - для гэтага трэба 10-20 рублёў.

Гісторыя ля вакзала з грашыма на квіток магла б быць пераканаўчай, але Дзмітрыю яна падалася падазронай.

- Калі я яму сказаў, што ён падыходзіць трэці раз, і папярэдзіў, што гэта спосаб махлярства, ён сказаў, што гэта справа кожнага - даваць грошы ці не даваць, ён юрыст і ведае законы. Папрасіў не крыўдзіцца, калі яшчэ раз падыдзе калі-небудзь.

Са слоў зборшчыка, у яго запазычанасць і яму трэба вярнуць $30 000 - іншых дэталяў пра яго Дзмітрый не ведае, але ён палічыў такія зборы сумнеўнымі.

- Бывае, камусьці рэальна бракуе, але гэта трэці раз сітуацыя з ім. Шкада людзей, якія зарабляюць і аддаюць проста так грошы. Гэта можна назваць па законе махлярствам, калі гэта адбываецца не першы раз? - Задаецца пытаннем Дзмітрый.

Ці сапраўды мужчына не збіраецца вяртаць грошы? Такіх довадаў няма, але аналагічных гісторый дастаткова.

Нагадаем: каб уключылася крымінальная адказнасць, калі чалавек узяў грошы «на квіток» і не аддае, у фізічнай асобы павінна быць выкрадзена больш за дзве базавыя адзінкі (84 рублі). Калі дзве базавыя і меншыя — адміністратыўная справа (штраф ад 2 да 30 базавых, грамадскія працы, арышт да 15 дзён).