Кіраўнік МУС Грузіі, які трапіў пад санкцыі, сыходзіць у адстаўку

• 28.05.2025, 10:19

Яго абвінавачваюць у разгонах пратэстаў.

Міністр унутраных спраў і віцэ-прэм'ер Грузіі Вахтанг Гомелаўры падаў у адстаўку.

Пра гэта ён паведаміў у звароце да грамадскасці, паведамляе «Эха Каўказа».

Вахтанг Гомелаўры быў унесены ў санкцыйныя спісы ЗША, Вялікабрытаніі і шэрагу краін ЕЗ за жорсткі разгон дэманстрацый у Тбілісі восенню мінулага года. Неўзабаве пасля гэтага грузінскія ўлады ўзнагародзілі яго ордэнам гонару, прысвоілі ранг генерал-палкоўніка і падвысілі, прызначыўшы віцэ-прэм'ерам.

Гомелаўры адзначыў, што пастанова аб адстаўцы далася яму няпроста, але цяпер, паводле ягоных слоў, надышоў спакойны час, калі ён можа надаць больш увагі сваёй сям'і.

«З 2011 года я быў удзельнікам той барацьбы, якую ўзначаліў спадар Бідзіна Іванішвілі і якая прынесла нашай краіне пераломныя змены. Для мяне каштоўныя і служаць прадметам гонару ўсе дасягненні, якіх дамаглася наша краіна пад кіраўніцтвам урадавай каманды. Зыходзячы з гэтага, я застаюся верны гэтай камандзе. І ў будучыні, у кожны час, гатовы стаць побач з дзяржавай і кіроўнай камандай, калі гэтага запатрабуе неабходнасць», – адзначыў Гомелаўры.

На працягу некалькіх гадоў Гомелаўры ўзначальваў ахову Бідзіны Іванішвілі. З 2013 года ён быў намеснікам міністра ўнутраных спраў, затым стаў кіраўніком ведамства, узначальваў Службу дзяржаўнай бяспекі, а ў 2019 годзе зноў быў прызначаны міністрам унутраных спраў.

Раней «Грузінская мара» правяла шэраг кадравых перастановак ва ўладных структурах і ўрадзе, легітымнасць якога не прызнаюць апазіцыя і частка грузінскай грамадскасці. Некаторыя палітолагі і экспэрты ўпэўненыя, што такім чынам кіроўная сіла рыхтуецца да мясцовых выбараў, якія павінны адбыцца восенню, а магчыма – і да новых парламенцкіх.