У МУС Беларусі пракаментавалі перастрэлку расейскіх сілавікоў у Воршы

• 26.05.2025, 19:09

Перастрэлку ўчынілі маёр і падпалкоўнік.

Цела 45-гадовага мужчыны знайшлі раніцай 26 траўня на трасе Р87 Ворша — Віцебск. Падрабязнасці інцыдэнту расказалі ў МУС.

Труп знайшлі каля пасёлка Высокае, Аршанскага раёна. Загінулы - грамадзянін Расеі. Побач з целам стаяла Lada без рэгістрацыйных знакаў, і валяўся прадмет, падобны на пісталет.

Па падазрэнні ў датычнасці да інцыдэнту аператыўнікі, якія прыбылі на месца, затрымалі 41-гадовага расейца.

«Следчымі вырашаецца пытанне аб распачынанні крымінальнай справы. Устанаўліваюцца прычыны ўчынення злачынства, род дзейнасці затрыманага і загінулага», - адзначылі ў МУС.

Як піша мясцовае выданне Orsha.eu, раніцай 26 траўня на скрыжаванне прыехалі двое высокапастаўленых супрацоўнікаў расейскай паліцыі. Адзін, паводле інфармацыі выдання, - маёр, іншы - падпалкоўнік. У абодвух былі пры сабе траўматычныя пісталеты, піша Orsha.eu. У выніку канфлікту адзін з яго ўдзельнікаў загінуў, другога затрымалі на месцы здарэння.

Аўтамабіль без нумароў. 26 траўня 2025 года, Аршанскі раён. Фота: МУС