Мянчанка адсудзіла ў горада 10 тысяч рублёў
- 26.05.2025, 16:45
Пасля хваравітага падзення на плітку ў гатэлі.
Суд Фрунзенскага раёна Менска задаволіў скаргу мянчанкі на гарадскія ўлады, камунальнікаў і гатэль за падзенне на плітку каля гатэля падчас галалёдзіцы. Цяпер ёй абавязаныя выплаціць маральную шкоду - 10 тысяч рублёў. Пра гэта паведамляе «Зеркало» са спасылкай на прэс-службу Менскага гарадскога суда.
У суд жанчына падала на КУП «Мінскзелянбуд», ААТ «Гатэль Планета», адміністрацыі Цэнтральнага раёна г. Менска, Менскага гарадскога выканаўчага камітэта, ДВА «Гаррамаўтадар Менгарвыканкама». З яе слоў, раніцай 1 лютага 2024 года пры перамяшчэнні па роўнай паверхні ад гатэля «Планета» ў кірунку праспекта Пераможцаў у горадзе Менску жанчына наступіла на тонкі незаўважны лёд на плітачным пакрыцці, паслізнулася і ўпала. У выніку падзення яна атрымала траўму ў выглядзе пералому вялікагалёначнай косткі і пералому вонкавай шчыкалаткі правай галёнкі са зрушэннем абломкаў, чым ёй была прычыненая маральная шкода.
У сувязі з атрыманай траўмай мянчанка знаходзілася на бальнічным больш за пяць месяцаў.
«Улічваючы перанесеныя фізічныя і маральныя пакуты, пазоўніца прасіла спагнаць на яе карысць кампенсаванне маральнай шкоды ў суме 50 тысяч рублёў. У судовым пасяджэнні пазоўніца свае патрабаванні падтрымала. Прадстаўнікі адказчыкаў у судовым пасяджэнні патрабаванне не прызналі», - адзначаюць у судзе.
Суд Фрунзенскага раёна пазоў мянчанкі задаволіў. Праўда, на пастанову суда маральную шкоду жанчыне павінна аплаціць толькі адміністрацыя Цэнтральнага раёна. І, як першы раз пастанавіў суд, толькі 5 тысяч рублёў.
«Пры вынясенні выраку судом улічвалася, што месца падзення пазоўніцы належыць да зямель агульнага карыстання, якое за спецыялізаванымі арганізацыямі замацаванае не было. Такім чынам, абавязак па кампенсацыі пазоўніцы маральнай шкоды суд усклаў на адміністрацыю Цэнтральнага раёна Менска, якая павінна была, але не забяспечыла належную ачыстку і апрацоўку супрацьгалалёднымі сродкамі тратуара на месцы падзення пазоўніцы. Падстаў для спагнання маральнай шкоды з іншых адказчыкаў суд не ўгледзеў», — адзначаецца ў паведамленні суда.
Каб вызначыць суму грашовай кампенсацыі, суд улічваў характар прычыненых фізічных і маральных пакут, а таксама «патрабаванні разумнасці і справядлівасці». Пры гэтым суд улічыў і працягласць бальнічнага, а таксама неабходнасць правядзення хірургічнага лячэння.
Мянчанка з пастановай суда не пагадзілася, як і адміністрацыя Цэнтральнага раёна. Абодва бакі падалі апеляцыйныя скаргі. У сваёй скарзе жанчына прасіла аб скасаванні пастановы суда ў частцы сумы кампенсацыі маральнай шкоды і задавальненні яе патрабаванняў напоўніцу. Адміністрацыя Цэнтральнага раёна, у сваю чаргу, прасіла скасаваць пастанову, бо мяркуе, што арганізацыяй, якая абслугоўвае зямельны надзел, на якім адбылося падзенне пазоўніцы, з'яўляецца КУП «Мінскзелянбуд».
«Праверыўшы законнасць і абгрунтаванасць пастановы суда першай інстанцыі, судовая калегія ў грамадзянскіх справах Менскага гарадскога суда пастанову суда Фрунзенскага раёна Менска змяніла ў частцы сумы кампенсацыі маральнай шкоды і спагнала з адміністрацыі Цэнтральнага раёна Менска на карысць пазоўцы кампенсацыю маральнай шкоды ў суме 10 тысяч рублёў. У астатняй частцы пастанова суда пакінутая без зменаў», - паведамілі ў судзе.
Вырак суда набыў законную моц.