Вялікая Брытанія западозрыла Расею ў арганізацыі падпалу дома прэм'ер-міністра

• 24.05.2025, 14:56

Трое зламыснікаў маглі ўступіць у змову з расейскай выведкай.

Служба бяспекі Вялікай Брытаніі расследуе дачыненне Масквы да арганізацыі падпалаў аб'ектаў нерухомасці, звязаных з кіраўніком брытанскага ўраду Кірам Стармерам, якія адбыліся ў пачатку траўня. Пра гэта са спасылкай на высокапастаўленых чыноўнікаў ураду каралеўства паведамляе Financial Times (FT).

Паводле падазрэння ў змове для здзяйснення падпалаў з намерам падвергнуць небяспецы жыцці людзей былі затрыманыя двое ўкраінцаў, Раман Лаўрыновіч і Пятро Пачынок, а таксама грамадзянін Румыніі Станіслаў Карпюк. У брытанскай паліцыі заявілі, што абвінавачаныя ўступілі ў змову з «іншымі невядомымі». Паводле адной з версій следчых, гэта маглі быць вярбоўшчыкі з расейскай выведкі.

На гэты момант траім падазраваным абвешчана абвінавачанне ў крымінальных злачынствах, а не ў злачынствах супраць нацыянальнай бяспекі, адзначае FT. Паводле словаў аднаго з урадавых чыноўнікаў, пакуль вядзецца расследаванне «розных версій падзей» і на гэтым этапе «нічога не выключана».

Пры гэтым нават калі Лондан установіць дачыненне Расеі да падпалаў, гэта не абавязкова будзе значыць, што яны былі здзейсненыя «на замову» расейскіх уладаў або што падазраваныя ведалі пра датычнасць Крамля. Раней пракурорка Сара Пшыбыльска адзначала, што матывы затрыманых высветліць пакуль не ўдалося.

Ва Уайтхоле таксама абмяркоўваецца магчымая рэакцыя Лондана пры пацверджанні версіі пра датычнасць да злачынстваў Расеі, паведамілі суразмоўцы.

Суд над абвінавачанымі прызначаны на 6 чэрвеня. Ніводны з падазраваных не заўважаны ў ідэалагічнай блізкасці да Расеі, удакладняе FT, а адзін з іх публікаваў святочныя фатаграфіі ўкраінскіх салдатаў.