У В'етнаме пастанавілі заблакаваць Telegram

• 23.05.2025, 12:26

Прычына - адмова ад супрацоўніцтва ў барацьбе са злачыннай дзейнасцю.

У В'етнаме поўнасцю заблакуюць доступ да мэсэнджара Telegram, піша The Moscow Times.

Указанне аб блакаванні доступу да платформы на адрас в'етнамскіх правайдэраў тэлекамунікацыйных паслуг разаслала Міністэрства тэхналогій краіны. Прычына - адмова ад супрацоўніцтва ў барацьбе са злачыннай дзейнасцю. Паводле падобных падстаў у Францыі пад следствам знаходзіцца заснавальнік Telegram Павел Дураў.

Міністэрства тэхналогій заклікала тэлекамунікацыйныя кампаніі «ўкараніць пастановы і захады для прадухілення дзейнасці Telegram ў В'етнаме». У дакуменце, датаваным 21 траўня, сказана, што правайдэры павінны паведаміць аб ужытых захадах не пазней за 2 чэрвеня.

Паводле звестак Дэпартамента кібербяспекі, 68% з 9600 каналаў і груп у мэсэнджары, якія дзейнічаюць у В'етнаме, парушаюць заканадаўства і звязаныя з махлярствам, продажам наркотыкаў і, як мяркуюць улады, тэрарызмам.

Прадстаўнік ведамства распавёў, што пастанова аб блакаванні сэрвісу рушыла ўслед за адмовай яго кіраўніцтва падаць ураду звесткі карыстачоў, калі яго аб гэтым папыталі ў рамках расследаванняў паводле крымінальных спраў.

Telegram у В'етнаме таксама абвінавачваюць у невыкананні патрабаванняў юрыдычных норм, якія абавязваюць сацсеткі адсочваць, выдаляць і блакаваць інфармацыю, якая парушае закон. Акрамя таго, згодна з дакументам, шэраг груп у мэсэнджары з дзясяткамі тысяч удзельнікаў «былі створаныя апазіцыйнымі і рэакцыйнымі суб'ектамі, якія распаўсюджваюць антыўрадавыя матэрыялы», паводле звестак паліцыі.