Украіна атакавала Расею беспілотнікамі два з паловай дні запар

• 23.05.2025, 9:44

У РФ паведамілі пра больш чым 750 БПЛА.

Узброеныя сілы Украіны (УСУ) арганізавалі самую зацяжную і масаваную атаку беспілотнікаў на расейскія рэгіёны пасля адмовы Пуціна ад спынення агню. Напад украінскіх дронаў, які пачаўся ўвечар 20 траўня, працягваўся амаль бесперапынна да раніцы 23 траўня, піша The Moscow Times.

Згодна з афіцыйнымі справаздачамі Мінабароны РФ, за гэты час дзяжурнымі сродкі супрацьпаветранай абароны (СПА) было збіта ўвогуле 756 беспілотнікаў самалётнага тыпу. Дарэчы, з 20 гадзін паводле маскоўскага часу 20 траўня да 8 раніцы 22 траўня было знішчана 485 дронаў, з 8 раніцы да 20 гадзін 22 траўня - 159, а пасля гэтага часу да 7 раніцы 23 траўня - яшчэ 112.

Пад удары патрапілі 15 рэгіёнаў Расеі і акупаваны Крым. Больш за ўсё беспілотнікаў было збіта над Арлоўскай (197 штук), Курскай (185) і Маскоўскай (109) абласцямі. Падчас нападаў часова забаранялі прымаць і выпускаць самалёты аэрапорты Уладзіміра, Калугі, Кастрамы, Тамбова, Яраслаўля, Іванава, Самары, Ніжняга Ноўгарада, а таксама маскоўскія Унукава, Дамадзедава, Шарамеццева і Жукоўскі. Былі затрыманы сотні авіярэйсаў, а многім пасажырам давялося чакаць вылету амаль дзень. Таксама ў шасці рэгіёнах абмежавалі працу мабільнага інтэрнэту. На такі захад пайшлі ў Тульскай, Ліпецкай, Варонежскай, Уладзімірскай, Арлоўскай і Іванаўскай абласцях. Мясцовыя ўлады папрасілі жыхароў «паставіцца з разуменнем» да гэтага.

Падчас масаванага налёту ўкраінскія беспілотнікі ўдарылі як мінімум па двух важных для вайскова-прамысловага комплексу прадпрыемствах: па Болхаўскім заводзе паўправадніковых прыбораў (АТ «БЗПП») у Арлоўскай вобласці, які вырабляе мікраэлектроніку для войска, і заводзе «Энэргія» ў Ліпецкай вобласці, які спецыялізуецца на авіяцыі.