Масква зноў пад ударам

• 23.05.2025, 8:15

Закрывалі аэрапорты «Унукава», «Дамадзедава», «Жукоўскі».

У краіне-агрэсарцы Расеі з вечара чацвярга, 22 траўня, расейцы зноў скардзяцца на атаку БПЛА ў некалькіх рэгіёнах. У сеціве пішуць, што дроны, дарэчы, атакавалі вайсковы аэрадром у расейскім Іванаве.

Там працавала СПА акупантаў, былі чутныя выбухі. Пра гэта пісалі расейскія прапагандысцкія каналы.

Таксама беспілотнікі былі зафіксаваныя ў Маскоўскай, Тульскай, Разанскай, Тамбоўскай, Ліпецкай абласцях. Расавіяцыя паведаміла пра ўвядзенне абмежаванняў на прыём і выпуск паветраных суднаў у аэрапортах «Унукаве», «Дамадзедаве», «Жукоўскім».

Адзначым, што ў аэрадроме «Паўночны» ў Іванаве (Іванаўская вобласць краіны-агрэсаркі) дзейнічае Цэнтр баявога выкарыстання і навучання вайскова-транспартнай авіяцыі РФ. Там дыслакаваная 243-я асобная вайскова-транспартная авіяцыйная эскадрылля і 81-ы вайскова-транспартны авіяцыйны полк.

Мэр Масквы Сяргей Сабянін увечары заявіў, што «сіламі СПА адбітая атака васьмі беспілотнікаў, якія ляцелі на Маскву». На месцы падзення абломкаў працуюць спецыялісты экстранных службаў. Пазней ён напісаў, што нібыта збітыя яшчэ дзевяць БПЛА.