У Беларусі ласі сталі ўсё часцей выходзіць да дарог

• 22.05.2025, 17:23

Вадзіцелі настойваюць на ахоўных сетках уздоўж трас.

Нядаўна зусім побач з Менскам карыстач форума Onliner зрабіў здымак лася, які выйшаў да дарогі. Перабягаць дарогу жывёла, праўда, не адважылася. Апошнім часам сахатых часта можна заўважыць каля дарог.

У гэтыя дні на трасе М1 лось сутыкнуўся з аўтамабілем. На Віцебшчыне жывёліна падышла вельмі блізка да машыны ДАІ. А каля трасы М6 два ласі ніяк не маглі вярнуцца ў лес - замінала агароджа. Адзін з нашых чытачоў мяркуе, што трэба сур'ёзна ставіцца да пытання ўстаноўкі ахоўных сетак уздоўж трас.

На відэа ніжэй можна заўважыць, як лось выйшаў да трасы Р1 каля кавярні «Дзедава карчма» (у кірунку да Фаніпаля). Гэта прыкладна за 10 кіламетраў ад сталіцы.

«Давайце ўзнімем пытанне аб усталёўцы ахоўных сетак ад дзікіх жывёл на трасах, - выказаўся адзін чытач. - Колькасць ДТЗ з іх удзелам павялічылася. Самому летась «пашанцавала» злавіць казулю. На хуткасці ухіліцца ад дзікай жывёлы няма ніякай магчымасці (не разумееш, што рабіць: тармазіць ці аб'язджаць?). Уначы тым больш. Траекторыю жывёлы нельга спрагназаваць. Знакі «Дзікія жывёлы» усталёўваюць толькі,, каб скінуць віну на кіроўцу. Немагчыма ехаць па дарозе і ўвесь час чакаць, што з абочыны хтосьці выскачыць. Гэта хуткасць 50-60 км/ч павінна быць, каб хоць неяк паспець зарыентавацца і затармазіць».

«Я там кожны дзень езджу і дзіўлюся, чаму не паставяць сеткі, - падтрымаў меркаванне аўтааматар па імені Аляксандр. - Там жа жывёла, цемра. Летась насупраць павароту на Васілеўшчыну калега збіў казулю, якая пераскочыла праз раздзяляльную агароджу на трасе яму пад машыну».

«У чаце суседзяў увесь час пішуць, што бачаць каля «Дзедавай карчмы» казуль ці ласёў. Сам я неаднаразова на прамежку дарогі ад Шчомысліцы да Фаніпаля сустракаў жывёл, якая спрабавала перабегчы дарогу», - дадаў мужчына.