Зяленскі правёў нараду па падрыхтоўцы абмену палоннымі «1000 на 1000»

• 22.05.2025, 14:57

Кіраўнік Мінабароны Украіны кантралюе арганізацыю працэсу.

Прэзідэнт Украіны Уладзімір Зяленскі правёў нараду па падрыхтоўцы абмену ваеннапалоннымі.

Аб гэтым ён паведаміў у Telegram, паведамляе Цензор.НЕТ.

«Дамоўленасць аб вызваленні 1000 нашых людзей з расейскага палону стала ці не адзіным рэальным вынікам сустрэчы ў Турцыі. Працуем, каб гэты вынік быў забяспечаны.

Былі даклады па кантактах з расейцамі», - гаворыцца ў паведамленні.

Са слоў Зяленскага, кіраўнік Мінабароны Умераў кантралюе арганізацыю працэсу і выкананне дамоўленасці.

«Прыцягнутыя ГУВ, СБУ, СВР, МУС, упаўнаважаны Вярхоўнай Рады Украіны ў правах чалавека і каманда Офіса. Высвятляем дэталі аб кожным чалавеку, якога падалі ў спісах з расейскага боку.

Гэта адна з ключавых задач Украіны - вярнуць усіх нашых людзей з расейскай няволі. Дзякуй кожнаму, хто дапамагае», - падсумаваў прэзідэнт Украіны.

Нагадаем, што дамоўленасць аб адначасовым вызваленні і перадачы палонных 1000 на 1000 чалавек была дасягнутая паміж дэлегацыямі Украіны і РФ у Стамбуле 16 траўня 2025 года.