У Мінпрацы Беларусі назвалі пяць памылак пры афармленні адпачынку
- 22.05.2025, 12:33
Штраф - да 840 рублёў.
Набліжаецца лета - традыцыйны сезон адпачынкаў. У Міністэрстве працы і сацыяльнай абароны Беларусі пералічылі пяць тыповых памылак пры афармленні працоўнага адпачынку і расказалі, у якім выпадку наймальніку пагражае штраф да 840 рублёў.
Першай памылкай у Мінпрацы назвалі адсутнасць графіка адпачынкаў. Там падкрэслілі, што ён абавязковы для ўсіх арганізацый, у тым ліку прыватных і для індывідуальных прадпрымальнікаў (ІП). Зацвердзіць графік павінны да 5 студзеня і, калі гэта прадугледжана калектыўнай дамовай, узгадніць з прафзвязам.
Згодна з арт.168 Працоўнага кодэкса (ПК) Беларусі, пры складанні графіка працоўных адпачынкаў наймальнік абавязаны запланаваць адпачынак на жаданне работніка ў летні або іншы зручны час:
• работнікам, маладзейшым за 18 гадоў,
• маці (мачысе), якая выхоўвае дваіх і больш дзяцей ва ўзросце да 14 гадоў, а таксама маці (мачые), бацьку (айчыму), якія выхоўваюць дзіця-інваліда ва ўзросце да 18 гадоў,
• удзельнікам ліквідацыі наступстваў катастрофы на Чарнобыльскай АЭС,
• донарам крыві і яе кампанентаў, узнагароджаным нагрудным знакам адрознення Міністэрства аховы здароўя «Ганаровы донар Рэспублікі Беларусь», знакам гонару «Ганаровы донар Рэспублікі Беларусь», знакамі «Ганаровы донар СССР», «Ганаровы донар Таварыства Чырвонага Крыжа БССР»,
• і не толькі.
Другую памылку наймальнік дапусціў, калі не апавясціў работніка за 15 дзён да пачатку адпачынку. Гэта можна зрабіць двума спосабамі: накіраваць апавяшчэнне кіраўнікам падраздзяленняў для далейшага пісьмовага азнаямлення работнікаў або ж індывідуальна паведаміць работніку ў пісьмовай форме.
Трэцяя памылка дапушчаная, калі наймальнік не адпраўляе супрацоўніка ў адпачынак кожны працоўны год (ён не роўны каляндарнаму, пачатак працоўнага года - з даты прыёму на працу). «Мінімум 14 дзён адпачынку абавязковыя кожны год», - адзначылі ў Мінпрацы.
Там расказалі, што перанос часткі адпачынку магчымы толькі са згоды работніка. Пры гэтым непаўналетнім і тым, хто працуе ў шкодных або небяспечных умовах працы, пераносіць адпачынак нельга - ім абавязаны прадастаўляць поўны адпачынак штогод.
«Штраф за парушэнне - 84-840 руб (2-20 БА)», - паведамілі ў ведамстве, маючы на ўвазе штраф для наймальнікаў за парушэнне.
Чацвёртай памылкай, звязанай з працоўнымі адпачынкамі, у Мінпрацы назвалі познюю выплату адпускных. Іх павінны перавесці за два каляндарныя дні да адпачынку або — пры згодзе работніка — цягам двух працоўных дзён з пачатку адпачынку.
Пятая памылка - незаконны водгук работніка з адпачынку. Гэта магчыма толькі на ініцыятыву наймальніка і са згоды работніка. Пры гэтым нельга адклікаць з адпачынку непаўналетніх і работнікаў са шкоднымі ўмовамі працы.