Ёсць пенсійная пастка, ад якой не застрахаваны практычна ніводзін беларус

• 21.05.2025, 17:56

Амаль 50 тысяч работнікаў ужо страцілі частку стажу.

Запазычанасць арганізацый і індывідуальных прадпрымальнікаў у страхавых унёсках у Фонд сацыяльнай абароны насельніцтва (ФСАН) на 1 красавіка гэтага года склала 5,2 млн рублёў. Для параўнання: на 1 студзеня яна была на ўзроўні 5,1 млн рублёў, а ў пачатку 2022-га — 4 млн рублёў, піша «Зеркало».

Чым пагражае работнікам запазычанасць наймальніка перад ФСАН

Калі арганізацыі і ІП не пагасяць пратэрмінаваную запазычанасць перад ФСАН, то ў першую чаргу могуць пацярпець работнікі. Працоўны стаж залічваецца пры выплаце абавязковых страхавых унёскаў у бюджэт фонду.

На пачатак 2020 года ў пенсійную пастку трапілі 43,8 тысячы работнікаў. У іх праз нявыплату ўнёскаў у бюджэт ФСАН не фармуецца страхавы стаж за перыяды фактычна адпрацаванага імі часу. Гаворка ідзе аб арганізацыях, якія працуюць у звычайных умовах, якія ліквідуюцца ў агульнаграмадзянскім парадку і прызнаныя банкрутамі.

Пры гэтым праз абвяшчэнне арганізацый банкрутамі не менш за 47 тысяч работнікаў ужо страцілі частку стажу для налічэння пенсіі, гаварылася ў абгрунтаванні да законапраекта аб унёсках у ФСАН, паведамлялі раней у Мінпрацы.