Еўразвяз зацвердзіў 17-ы пакет санкцый супраць Расеі

• 20.05.2025, 13:48

Яны закрануць «ценявы флот» РФ.

Рада Еўрапейскага Звязу ў аўторак, 20 траўня, зацвердзіла 17-ы пакет санкцый супраць Расейскай Федэрацыі.

Пра гэта паведаміла Высокая прадстаўніца ЕЗ у замежных дачыненнях і палітыцы бяспекі Кая Калас у сацыяльнай сетцы Х.

«ЕЗ ухваліў 17-ы пакет санкцый супраць Расеі, накіраваны супраць амаль 200 караблёў ценявога флоту. Новыя меры таксама тычацца гібрыдных пагроз і правоў чалавека», — заявіла яна.

Таксама, са слоў Калас, рыхтуюцца новыя санкцыі супраць Расеі.

«Чым даўжэй Расея вядзе вайну, тым больш жорсткім будзе наш адказ», — дадала высокая прадстаўніца ЕЗ у замежных стасунках і палітыцы бяспекі.

Кіраўнік Офіса прэзідэнта Украіны Андрэй Ярмак у сваім Telegram распавёў, што новы пакет санкцый змяшчае комплексныя меры, якія ўдараць па ключавых элементах вайсковай машыны РФ, яе «ценявому флоту» і схемах абыходу экспартнага кантролю, піша unian.net.

«Плануецца ўвесці абмежаванні супраць яшчэ 17 фізічных і 58 юрыдычных асоб, а таксама заблакаваць 189 новых суднаў, якія перавозяць расейскую нафту, зброю і выкрадзенае ўкраінскае зерне. Усяго пад абмежаваннем будуць ужо 342 судны. Асабліва важна: пад жорсткія санкцыі трапляюць кампаніі не толькі з РФ, але і з трэціх краін - з Турцыі, В'етнама, Узбекістана, ААЭ - якія дапамагалі расейскаму ВПК абыходзіць абмежаванні і пастаўлялі кампаненты для дронаў і ракет», — адзначыў ён.