Краіны Балтыі рыхтуюць правілы для барацьбы з «ценявым флотам» Пуціна

• 18.05.2025, 14:43

Караблі РФ больш не схаваюцца.

Шэраг краін Еўрапейскага Звязу распрацуе правілы абыходжання з суднамі так званага «ценявога флоту» Расейскай Федэрацыі ў Балтыйскім моры.

Пра гэта заявіў міністр замежных спраў Літвы Кястуціс Будрыс, паведамляе на Delfi.

Заява міністра прагучала на фоне інцыдэнту ў Эстоніі, калі ў яе эканамічных водах было заўважанае судна «ценявога флоту». Тады экіпаж судна адмовіўся выконваць указанні эстонскіх улад.

«Мы будзем каардынаваць і распрацоўваць агульныя правілы ў рамках СДБМ аб тым, як дзейнічаць у выпадках, калі судны не падпарадкоўваюцца інструкцыям або судны класіфікуюцца як «ценявы флот» і ўвогуле не маюць сцяга, як гэта было ў гэты раз. Яны не павінны падпадаць пад дзеянне міжнародных прававых нормаў, якія абараняюць іх юрысдыкцыю», - заявіў Будрыс.

Ён расказаў, што Рада дзяржаў Балтыйскага мора таксама абмеркавала магчымасць абмежавання руху ценявых суднаў праз пратокі.

«Міжнароднае марское права ў гэтай сітуацыі не зусім зразумела, але відавочна, што, калі ёсць судны без сцяга, прастора для дзеянняў прыбярэжных дзяржаў шырэйшая», - сказаў кіраўнік МЗС Літвы.

На яго думку, пашырэнне санкцыйнага спісу да ценявых суднаў таксама абмяжуе магчымасці Расеі выкарыстоўваць свой флот.

«Яшчэ адзін захад - сінхранізацыя ўсіх наяўных спісаў суднаў, якія знаходзяцца ў розных санкцыйных спісах, у розных юрысдыкцыях. Гэта Злучаныя Штаты Амерыкі, Вялікая Брытанія і Еўрапейскі Звяз. Нам трэба пашырыць гэты спіс. Пасля 17-га пакета там зараз 350 суднаў, нам трэба яго цалкам запоўніць, каб яшчэ больш знізіць магчымасці Расеі выкарыстоўваць флот і ўяўляць для нас пагрозу», - адзначыў Будрыс.