Нямеччына і ЗША запусцяць вытворчасць ракет для Patriot і HIMARS у Еўропе

• 17.05.2025, 21:52

Асаблівы акцэнт будзе зроблены на выпуск ракет далёкага радыусу.

Нямецкі канцэрн Rheinmetall і амерыканская Lockheed Martin ствараюць сумеснае прадпрыемства па выпуску ракет ATACMS, GMLRS, Hellfire, JAGM і PAC-3.

Як піша Hartpunkt, буйнамаштабная вытворчасць ракет і рэактыўных набояў, у тым ліку ўзбраення для сістэмы СПА Patriot, разгорнутая ў Еўропе, каб скараціць залежнасць ад ЗША і паскорыць забеспячэнне.

Кіраўнік Rheinmetall Армін Папергер паведаміў, прычына гэтага ў тым, што вытворчых магутнасцяў у ЗША недастаткова для задавальнення попыту ў Еўропе. "Часам даводзіцца чакаць дзесяць гадоў, каб атрымаць ракеты з Амерыкі, гэта занадта доўга", - сказаў ён.

Папергер дадаў, што кампанія плануе кантраляваць 60 працэнтаў сумеснага прадпрыемства. Магутнасці дазволяць выпускаць да 10 тыс. ракет за год. Запуск вытворчасці намечаны на 2026-2027 гады.

Асаблівы акцэнт будзе зроблены на выпуск ракет далёкага радыусу, якія патрэбны Украіне і краінам Еўропы.

Цяпер Lockheed і Rheinmetall чакаюць адабрэння ўрадаў ЗША і Нямеччыны.