На два амерыканскія штаты абрынуліся тарнада

• 17.05.2025, 21:27

Без электрычнасці засталіся сотні тысяч дамоў.

Сама меней 21 чалавек загінуў і яшчэ дзясяткі пацярпелі ў выніку тарнада, якія абрынуліся на амерыканскія штаты Місуры і Кентукі, заявілі мясцовыя ўлады ў суботу, 17 траўня, паведамляе «Нямецкая хваля».

Губернатар штата Кентукі Эндзі Бешыр паведамляе пра 14 загінулых у рэгіёне. "На жаль, чакаецца, што гэтая колькасць будзе расці па меры атрымання дадатковай інфармацыі", – напісаў ён у сацсетцы X.

У Місуры не менш за сем загінулых, паведамляюць са спасылкай на ўлады штата газета The New York Times і тэлеканал CNN. Між іншым, пяць чалавек загінулі ў акрузе Сэнт-Луіс, яшчэ двое - у акрузе Скот.

Губернатар Місуры Майк Кеха напісаў у X, што ён і ягоная жонка "глыбока засмучаныя" гэтай навіной. Ён заклікаў людзей пазбягаць разбураных раёнаў, каб аварыйна-выратавальныя службы маглі выконваць сваю работу.

Першапачаткова CNN таксама паведамляў аб не менш за 10 пацярпелых у Місуры, але пазней указаў, што дакладная колькасць невядомая. The New York Times пісала аб дзясятках пацярпелых у абодвух штатах.

У сацсетках распаўсюджваюцца фатаграфіі і відэа, на якіх бачныя разбурэнні пасля ўдару стыхіі. Пошукава-выратавальныя работы працягваюцца. Паводле звестак маніторынгавага рэсурсу PowerOutage, без электрычнасці засталіся сотні тысяч дамоў.