Bild: У Нямеччыне самалёт з пасажырамі 10 хвілін ляцеў без пілотаў

• 17.05.2025, 16:39

Адзін з пілотаў страціў прытомнасць.

У Нямеччыне пасажырскі самалёт на час апынуўся без кіравання ў паветры, калі адзін з пілотаў пакінуў кабіну, а другі страціў прытомнасць, піша нямецкае выданне BILD.

Інцыдэнт здарыўся 17 лютага мінулага года, але публічна пра яго стала вядома толькі зараз. Паведамляецца, што Airbus A321 кампаніі Lufthansa ляцеў з Франкфурта ў гішпанскую Севілью, калі на вышыні 10700 метраў здарылася непрадбачанае.

Як вынікае з апублікаванай справаздачы гішпанскай камісіі ў расследаванні авіяцыйных здарэнняў, капітан экіпажа пакінуў кабіну пілотаў для наведвання прыбіральні. Адразу пасля гэтага другі пілот раптам страціў прытомнасць, імаверна, у выніку нейкага прыступу. Хоць кіраванне лайнерам падхапіла сістэма аўтапілота, самалёт усё ж крыху адхіліўся ад курсу.

Некаторы час капітан судна не мог вярнуцца ў кабіну, бо дзверы не адчыняліся без пацвярджэння доступу з боку другога пілота.

На шчасце, ужо праз восем хвілін другі пілот усё ж прыйшоў у прытомнасць і адчыніў дзверы капітану. Пасля гэтага экіпаж прыняў пастанову аб экстраннай пасадцы ў Мадрыдзе.

У аэрапорце другога пілота адразу перадалі лекарам. Пазней яны высветлілі, што прычынай страты прытомнасці стала раней не дыягнаставанае неўралагічнае захворванне.