Літоўскія памежнікі перахапілі «супердрон» з 3 тысячамі пачкаў цыгарэт з Беларусі

• 17.05.2025, 16:12

Беспілотнік заўважылі ў раёне вёскі Сакаліне.

Супрацоўнікі заставы Трыбаніс Варэнскага памежных атрада ўвечары 15 траўня перахапілі ў Салечніцкім раёне Літвы «супердрон» з грузам кантрабандных цыгарэт з Беларусі, паведамляе «Позірк» са спасылкай на Службу аховы дзяржаўнай мяжы (САДМ) гэтай балтыйскай дзяржавы.

Беспілотнік заўважылі ў раёне вёскі Сакаліне (прымыкае да Воранаўскага раёна Гарадзенскай вобласці), ён рухаўся ўглыб Літвы з боку беларускай мяжы. Памежнікі перахапілі кіраванне дронамі і пасадзілі яго.

- У наваколлях вёскі Раўдонбаліс, у лясістай мясцовасці прыкладна ў 400 метрах ад мяжы, яны выявілі лятальны апарат з прымацаваным да яго вялікім скруткам, - гаворыцца ў паведамленні. - У скрутку было шэсць стандартных каробак цыгарэт, абгорнутых празрыстай поліэтыленавай плёнкай. У кардонных каробках з лагатыпамі гарадзенскай тытунёвай фабрыкі «Нёман» знаходзіліся цыгарэты Minsk Superslims з беларускімі акцызнымі маркамі — усяго 3 000 пачкаў.

САДМ адзначае, што звычайна робаты кантрабандыстаў «з-за абмежаванай грузападымальнасці перавозяць ад 200 да 400 пачкаў цыгарэт - менш, чым у стандартнай завадской ўпакоўцы (50 блокаў, або 500 пачкаў)».

- Перахоплены памежнікамі Трыбаніса «супердрон», які дастаўляў адразу 3 тыс. пачкаў, стаў рэдкім выключэннем. Са слоў супрацоўнікаў САДМ, перахоплены апарат з падвоенымі шрубамі - гэта спецыялізаваная сельскагаспадарчая тэхніка, - адзначае ведамства.

Паводле факта незаконнага абароту падакцызных тавараў пачата дасудовае расследаванне. Адзначаецца, што за такое злачынства прадугледжаны штраф ці пазбаўленне волі на тэрмін да 4 гадоў.