Forbes: Не згаджайцеся на «хлебныя крошкі»

• 17.05.2025, 15:53

Псіхолагі вызначылі тры самыя важныя моманты ў перапісцы.

У эпоху анлайн-стасункаў тэкставыя паведамленні сталі люстэркам рэальных эмоцый - і эмацыйнай недаступнасці, піша часопіс Forbes (пераклад - сайт Charter97.org).

Псіхолагі выявілі тры трывожныя патэрны ў перапісцы, якія могуць сігналізаваць: чалавек не гатовы да блізкіх стасункаў, нават калі здаецца ўважлівым.

«Хлебныя крошкі»

Так званыя «хлебныя крошкі» - гэта рэдкія паведамленні, накшталт «прывітанне», мэмаў або смайлікаў, якія падтрымліваюць ілюзію стасункаў, але не прыводзяць да збліжэння. Такія суразмоўцы пазбягаюць шчырасці, а на пачуцці адказваюць жартам ці маўчаннем. Вы быццам застаяцеся на кручку, спадзеючыся на большае, але ў падвешаным стане.

Даследаванні паказваюць: да такой мадэлі стасункаў часцей схільныя людзі з трывожным або пазбягаючым тыпам прыхільнасці - тыя, хто баіцца блізкасці, але хоча заставацца патрэбным.

Павярхоўныя паведамленні

Ёсць і іншы тып: чалавек піша кожны дзень, адказвае хутка, зычыць добрай раніцы і спакойнай ночы - але, варта падзяліцца чымсьці асабістым, як убачыце банальнае «шкада» або змену тэмы. Фармальна сувязь ёсць, але эмацыйнай глыбіні няма.

Так праяўляецца эмацыйнае дыстанцыяванне. Такія людзі могуць быць шчыра зацікаўленыя, але не гатовы адкрывацца. У выніку суразмоўца адчувае адзіноту, нават пры сталай перапісцы.

Аналітыка замест эмпатыі

Гэты тып умее хораша размаўляць, часта ўражвае інтэлектам і ўцягнутасцю. Але замест суперажывання вы атрымліваеце аналіз сваіх эмоцый - быццам вы не дзеліцеся, а праходзіце псіхааналіз. Вас чуюць, але не адчуваюць.

Такая стратэгія - спосаб пазбегнуць эмацыйнай рызыкі. Паводле даследаванняў, людзі з пазбягаючым тыпам прыхільнасці часцей выкарыстоўваюць разумовыя (а не эмацыйныя) рэакцыі на выражэнне пачуццяў суразмоўцы.

Як зразумець, што гэта не проста стыль стасункаў, а сігнал?

Калі пасля перапіскі вы адчуваеце трывогу, нявызначанасць, адзіноту — гэта важная нагода задумацца. Стасункі павінны прыносіць не толькі кантакт, але і «эмацыйную напоўненасць».

Псіхолаг раіць: задайце сабе тры пытанні:


Што вы шукаеце ў гэтых стасунках?
Чаго вы спрабуеце дабіцца, працягваючы іх?
Як выглядаў бы выбар на карысць унутранага спакою, а не барацьбы за нечую ўвагу?



Блізкасць - гэта не колькасць паведамленняў, а якасць водгуку. Не згаджайцеся на крошкі.